LIBER GENESIS 14

₁factum est autem in illo tempore ut Amrafel rex Sennaar

et Arioch rex Ponti et Chodorlahomor rex Aelamitarum

et Thadal rex Gentium

₂inirent bellum contra Bara regem Sodomorum

et contra Bersa regem Gomorrae et contra Sennaab regem Adamae

et contra Semeber regem Seboim contraque regem Balae ipsa est Segor

₃omnes hii convenerunt in vallem Silvestrem quae nunc est mare Salis

₄duodecim enim annis servierant Chodorlahomor

et tertiodecimo anno recesserunt ab eo

₅igitur anno quartodecimo venit Chodorlahomor et reges qui

erant cum eo

percusseruntque Rafaim in Astharothcarnaim et Zuzim cum eis

et Emim in Savecariathaim

₆et Chorreos in montibus Seir

usque ad campestria Pharan quae est in solitudine

₇reversique sunt et venerunt ad fontem Mesfat ipsa est Cades

et percusserunt omnem regionem Amalechitarum

et Amorreum qui habitabat in Asasonthamar

₈et egressi sunt rex Sodomorum et rex Gomorrae

rexque Adamae et rex Seboim nec non et rex Balae quae est Segor

et direxerunt contra eos aciem in valle Silvestri

₉scilicet adversum Chodorlahomor regem Aelamitarum

et Thadal regem Gentium et Amrafel regem Sennaar

et Arioch regem Ponti quattuor reges adversus quinque

₁₀vallis autem Silvestris habebat puteos multos bituminis

itaque rex Sodomorum et Gomorrae terga verterunt cecideruntque ibi

et qui remanserant fugerunt ad montem

₁₁tulerunt autem omnem substantiam Sodomorum et Gomorrae

et universa quae ad cibum pertinent et abierunt

₁₂nec non et Loth et substantiam eius

filium fratris Abram qui habitabat in Sodomis

₁₃et ecce unus qui evaserat nuntiavit Abram Hebraeo

qui habitabat in convalle Mambre Amorrei

fratris Eschol et fratris Aner

hii enim pepigerant foedus cum Abram

₁₄quod cum audisset Abram captum videlicet Loth fratrem suum

numeravit expeditos vernaculos suos trecentos decem et octo

et persecutus est eos usque Dan

₁₅et divisis sociis inruit super eos nocte

percussitque eos et persecutus est

usque Hoba quae est ad levam Damasci

₁₆reduxitque omnem substantiam

et Loth fratrem suum cum substantia illius

mulieres quoque et populum

₁₇egressus est autem rex Sodomorum in occursum eius

postquam reversus est a caede Chodorlahomor et regum qui cum eo erant

in valle Save quae est vallis Regis

₁₈at vero Melchisedech rex Salem proferens panem et vinum

erat enim sacerdos Dei altissimi

₁₉benedixit ei et ait

benedictus Abram Deo excelso qui creavit caelum et terram

₂₀et benedictus Deus excelsus

quo protegente hostes in manibus tuis sunt

et dedit ei decimas ex omnibus

₂₁dixit autem rex Sodomorum ad Abram

da mihi animas cetera tolle tibi

₂₂qui respondit ei

levo manum meam ad Dominum Deum excelsum possessorem caeli et

terrae

₂₃quod a filo subteminis usque ad corrigiam caligae

non accipiam ex omnibus quae tua sunt

ne dicas ego ditavi Abram

₂₄exceptis his quae comederunt iuvenes

et partibus virorum qui venerunt mecum Aner Eschol et Mambre

isti accipient partes suas