LIBER EXODI 8

₁dixitque Dominus ad Mosen

ingredere ad Pharao et dices ad eum

haec dicit Dominus dimitte populum meum ut sacrificet mihi

₂sin autem nolueris dimittere

ecce ego percutiam omnes terminos tuos ranis

₃et ebulliet fluvius ranas

quae ascendent et ingredientur domum tuam

et cubiculum lectuli tui et super stratum tuum

et in domos servorum tuorum

et in populum tuum et in furnos tuos

et in reliquias ciborum tuorum

₄et ad te et ad populum tuum

et ad omnes servos tuos intrabunt ranae

₅dixitque Dominus ad Mosen dic Aaron

extende manum tuam super fluvios

et super rivos ac paludes

et educ ranas super terram Aegypti

₆extendit Aaron manum super aquas Aegypti

et ascenderunt ranae operueruntque terram Aegypti

₇fecerunt autem et malefici per

incantationes suas similiter

eduxeruntque ranas super terram Aegypti

₈vocavit autem Pharao Mosen et Aaron et dixit

orate Dominum ut auferat ranas a me et a populo meo

et dimittam populum ut sacrificet Domino

₉dixitque Moses Pharaoni

constitue mihi quando deprecer pro te

et pro servis tuis et pro populo tuo

ut abigantur ranae a te et a domo tua

et tantum in flumine remaneant

₁₀qui respondit cras

at ille iuxta verbum inquit tuum

ut scias quoniam non est sicut Dominus Deus noster

₁₁et recedent ranae a te et a domo tua et a servis tuis et a populo tuo

tantum in flumine remanebunt

₁₂egressique sunt Moses et Aaron a Pharaone

et clamavit Moses ad Dominum

pro sponsione ranarum quam condixerat Pharaoni

₁₃fecitque Dominus iuxta verbum Mosi

et mortuae sunt ranae de domibus et de villis et de agris

₁₄congregaveruntque eas in inmensos aggeres et conputruit terra

₁₅videns autem Pharao quod data esset requies

ingravavit cor suum et non audivit eos sicut praeceperat Dominus

₁₆dixitque Dominus ad Mosen loquere ad Aaron

extende virgam tuam et percute pulverem terrae

et sint scinifes in universa terra Aegypti

₁₇feceruntque ita

et extendit Aaron manu virgam tenens

percussitque pulverem terrae

et facti sunt scinifes in hominibus et in iumentis

omnis pulvis terrae versus est in scinifes per totam terram

Aegypti

₁₈feceruntque similiter malefici incantationibus suis

ut educerent scinifes

et non potuerunt

erantque scinifes tam in hominibus quam in iumentis

₁₉et dixerunt malefici ad Pharao

digitus Dei est

induratumque est cor Pharaonis et non audivit eos

sicut praeceperat Dominus

₂₀dixit quoque Dominus ad Mosen

consurge diluculo et sta coram Pharaone

egreditur enim ad aquas

et dices ad eum haec dicit Dominus

dimitte populum meum ut sacrificet mihi

₂₁quod si non dimiseris eum

ecce ego inmittam in te et in servos tuos

et in populum tuum et in domos tuas omne genus muscarum

et implebuntur domus Aegyptiorum muscis diversi generis

et in universa terra in qua fuerint

₂₂faciamque mirabilem in die illa terram

Gessen

in qua populus meus est

ut non sint ibi muscae

et scias quoniam ego Dominus in medio terrae

₂₃ponamque divisionem inter populum meum et populum tuum

cras erit signum istud

₂₄fecitque Dominus ita

et venit musca gravissima in domos Pharaonis et servorum eius

et in omnem terram Aegypti

corruptaque est terra ab huiuscemodi muscis

₂₅vocavit Pharao Mosen et Aaron et ait eis

ite sacrificate Deo vestro in terra

₂₆et ait Moses non potest ita fieri

abominationes enim Aegyptiorum immolabimus Domino Deo

nostro

quod si mactaverimus ea quae colunt Aegyptii coram eis

lapidibus nos obruent

₂₇via trium dierum pergemus in solitudine

et sacrificabimus Domino Deo nostro

sicut praeceperit nobis

₂₈dixitque Pharao ego dimittam vos

ut sacrificetis Domino Deo vestro in deserto

verumtamen longius ne abeatis rogate pro me

₂₉et ait Moses egressus a te orabo Dominum

et recedet musca a Pharaone

et a servis et a populo eius cras

verumtamen noli ultra fallere

ut non dimittas populum sacrificare Domino

₃₀egressusque Moses a Pharao oravit Dominum

₃₁qui fecit iuxta verbum illius

et abstulit muscas a Pharao

et a servis et a populo eius

non superfuit ne una quidem

₃₂et ingravatum est cor Pharaonis

ita ut ne hac quidem vice dimitteret populum